غادي يدير المكتب المديري للعصبة الوطني لكرة القدم الإحترافية اجتماع الثلاثاء الجاي، وهادشي بالتزامن مع عودة منافسات البطولة الوطنية من تقريبا شهر على توقفها حيث كان المنتخب الوطني المغربي مشارك فكأس العالم. وقرر المكتب المديري للعصبة الوطنية لكرة القدم الاحترافية برئاسة عبد السلام بلقشور، يعقدو اجتماع يوم الثلاثاء 27 دجنبر 2022 ابتداء من الساعة الخامسة بعد الزوال بمركب محمد السادس لكرة القدم بالمعمورة، وهو نفس اليوم اللي غادي ترجع فيه منافسات البطولة الإحترافية من خلال إجراء مبارتين عن الجولة 9، الأولى ما بين الرجاء والمغرب الفاسي، والثانية ما بين نهضة بركان واتحاد طنجة. ومن بعد ساعة على إنطلاق اجتماع المكتب المديري للعصبة الوطنية لكرة القدم الإحترافية واللي تحدد مع 5 لعشية من نهار الثلاثاء المقبل، غادي يكون الجمهور المغربي على موعد مع ماتش من قمم كرة القدم المغربية واللي غادي يبدا مع 6 وربع د لعشية من نفس اليوم ما بين الرجاء الرياضية والمغرب الفاسي، ومن بعدها ماتش بركان واتحاد طنجة مع 8 ونصف د الليل. وغادي يوضع اختيار موعد عقد اجتماع المكتب المديري العصبة الوطنية لكرة القدم الإحترافية الأعضاء ديالها فموقف محرج حيث كيتزامن مع عودة أول مباريات البطولة واللي كانت هي نفسها علنت عليه الأربعاء الماضي، ومن واحب العصبة الحرص على تتبع استئناف البطولة فأحسن الظروف، فالوقت اللي غادي يكون عزيز البدراوي رئيس الرجاء الرياضي ونائب رئيس العصبة الوطنية لكرة القدم الإحترافية فموقف صعب ومحرج حيث تعود يحضر ليماتش ديال الرجاء والمباراة ضد الماص مهمة بزاف حيث كتجي من بعد التوقف، خصوصا أن بداية الموسم كانت صعيبة عند الخضرا الشيء اللي كيخليها محتاجة لرئيسها معها فالتيران فهاد المرحلة وكيخليه هو ما بين يختار يحضر لتيران محمد الخامس بكازا ضد المغرب الفاسي أو يحضر اجتماع العصبة فمركز محمد السادس لكرة القدم بالمعمورة.
