بانون فتصريح بكى المغاربة: كنت غادي نحبس الكرة وما عارفش واش غادي نفيق نشوف ولدي.. والركراكي خلاني بطل وبفضلو دخلت للتاريخ – فيديو

انهار الدولي المغربي دبر بانون بالبكاء من بعد نهاية مشوار المنتخب الوطني المغربي فكأس العالم قطر 2022، بتحقيق المنتخب الوطني المغربي المركز الرابع فانجاز غير مسبوق لكرة القدم المغربية والإفريقية والعربية، وكشف أنه كان كيعاني قبل المونديال بسبب الإصابة ديالو بتداعيات كورونا اللي أثرت على القلب ديالو الشي اللي خلاه يتوقف على لعب كرة القدم، وكان كيهدد حياتو ماشي غير الكاريير ديالو.
وكشف بدر بانون فتصريح عاطيفي من بعد نهاية ماتش الترتيب فكاس العالم قطر 2022، ما بين المغرب وكرواتيا: "قبل دابا بأربعة أشهر كنت كنفكر كنت كنفكر أنني نحبس الكرة والفضل الكبير والشكر لوليد الركراكي، اللي خلاني نكون واحد من بين هاد الأبطال المغاربة اللي اليوم كيشرفو قميص المنتخب الوطني المغربي".
وكمل بدر بانون وهو كيبكي وفواحد الموقف عاطفي: "دزت من فترة صعبة لكن الدور ديال العائلة ديالي ومرتي كان مهم فواحد الفترة صعبة من الحياة ديالي وأنا اليوم أكثر إنسان سعيد لانني دخلت لتاريخ المنتخب المغربي وكنشرك أي واحد وقف معيا فهاديك الفترة اللي كنت فيها محتاج للمساعدة، حيت كتنعس بالليل وكتفكر واش غادي تصبح فالغد باش تشوف ولدك أو لا وهادشي كنت كنعيشو ولكن ما قدرتش نقولو حتى واحد واليوم شرف ليا انني من بين هاد الجيل الرائع وكنشكر أي شخص ساهم فهاد الانجاز".