ستيرلينك مالعبش مع الننكليز ضد السنغال حيث مسلحين هجمو على عائلتو وطار لعندهم

تعرضت عائلة الدولي الننكليزي رحيم ستيرلينك لهجوم من طرف مسلحين فدارهم الشي اللي خلاه يطير لندن باش يشوف شنو واقع، وما يلعبش ماتش ثمن نهائي كأس العالم قطر 2022، ضد السنغال.
وكشفت جريدة "ديلي ميل" البريطانية بلي شي شفارة مسلحين هجمو على الفيلا ديال رحيم ستيرلينك فلندن، اللي فيها مرتو وولادو نهار الأحد.
وقال نفس المصدر بلي رحيم ستيرلينك ناض كيجري وشد الطيارة من العاصمة القطرية الدوحة اللي كاين فيها منتخب بلادو فكأس العالم، ومشى لندن باش يشوف عائلتو شنو واقع لها.
للإشارة فرحيم ستيرلينك ما لعبش ماتش منتخب الننكليز والسنغال فثمن نهائي كأس العالم قطر 2022، واللي ربحوه النكالزة بنتيجة 3 لزيرو وتأهلو لربع النهائي باش يلعبو ضد فرنسا على بطاقة نصف النهائي، وبرر الاتحاد الننكليزي الغياب ديال اللعاب بلي عندو مشكل عائلي عاجل وكان ضروري يمشي يحلو.