الركراكي: كنشكر اللعابا وكنهدي التأهل للمغارية وغادي نتقاتلو فثمن نهائي المونديال

عبر وليد الركراكي مدرب المنتخب الوطني المغربي على الفرحة ديالو حيث ليكيب ناسيونال تأهلت لثمن نهائي كاس العالم من بعد 36 عام ديال الغياب وواعد للمغارية باش يتقاتل هو اللعابة فالدور الثاني من البطولة.
وقال الركراكي من بعد الماتش ديال المغرب وكندا: "عيينا بزاف الماتش ماكانش ساهل، وكان علينا الضغط وملي ماركات كندا تخعلنا، ولكن المهم هو الرباح".
وكمل الركراكي وقال: "تاريخنا كامل كنا ربحنا غير 2 ماتشات فكأس العالم، ولكن فهاد المونديال ربحنا 2 فالكروبات، وكنشكر اللعابا راه ولاد الناس وكيتقاتلو على توني لبلاد وكنشكر الجمهور اللي كيستاهل الرباح حيث عاونا".
وأكد وليد الركراكي: "مازال غادي نتقاتلو ودابا خاصنا نعوضو المجهود ديال هاد الماتش ونبداو نفكرو فثمن النهائي".