"ليكيب" الفرنسية مختلفة بالرباح ديال المغرب على بلجيكا

احتفلت جريدة "ليكيب" الفرنسية برباح المنتخب الوطني المغربي على منتخب بلجيكا فماتش البارح الأحد فتيران "الثمامة" فالعاصمة القطرية الدوحة، ضمن الجولة الثانية من كأس العالم قطر 2022.
وخصصت "ليكيب" غلاف عددها اليوم الاثنين، للرباح لكبير اللي حققوه أسود الاطلس على شياطين بلجيكا، والطريقة اللي جا بها والفرحة ديال اللعابا المغاربة بالانتصار بجميع اللغات، وكيفاش احتفلو مع العائلات ديالهم والجمهور المغربي فالتيران وأشرف حكيمي مع ماماه، وجا عنوانها "ضربة ساحقة من الاطلس" فإشارة لقوة المنتخب المغربي اللي بينها ضد البلجيكين والهجمات ديالو على المرمى البلجيكي.
المغاربة وحسب الجريدة كانوا كيتسناو الرباح ديال المنتخب الوطني المغربي فكأس العالم من بعد 24 عام على آخر انتصار اللي كان فمونديال 1998 على منتخب سكتلاندا، وقالت بلي المغاربة دارو المفاجأة ضد بلجيكا ولكن كيستحقو الرباح فهاد الماتش، وراه دارو خطوة مهمة باش يتاهلو لدور ثمن النهائي فكأس العالم 2022.
"ليكيب" تكلمت على إحصائيات الماتش ما بين المنتخب الوطني المغربي ومنتخب بلجيكا وكيفاش جا الانتصار ديال المغاربة على شياطين بلجيكا، من الناحية التكتيكية والأدوار ديال اللعابا فالمواجهة، وكيفاش تغلب الناخب الوطني وليد الركراكي على الصبليوني روبيرتو مارتينيز مدرب بلجيكا والكوتشينك الشاعر اللي دار باش ربح الماتش ضد المنتخب المصنف رقم 2 فالعالم.
للإشارة فالمنتخب الوطني ربح منتخب بلجيكا بنتيجة 2 لزيرو، والبيت الأول ماركاه عبد الحميد الصبيري وحسباتو "الفيفا" لغانم سايس فالدقيقة 73، والثاني ماركاه زكرياء بو خلال فالدقية 92، من بعد أسيست ديال حكيم زياش.
وبهاد الرباح صبح المنتخب الوطني المغربي عندو 4 النقاط وكيتشارك مع كرواتيا صدارة لكروب 6 مع امتياز للمنتخب الكرواتي، وتراجعت بلجيكا للمركز الثالث وعندها 3 النقاط، أمام كندا الخصم الجاي ديال ليكيب ناسيونال تقصات من البطولة.