مكافأة للعابا ديال المنتخب حيث ربحو بلجيكا

بادر الناخب الوطني وليد الركراكي لمكافأة اللعابا ديال المنتخب الوطني المغربي من بعدما ربحو بلجيكا بنتيجة 2 لزيرو، البارح الأحد فثاني جولة من كأس العالم قطر 2022.
وعيط وليد الركراكي للعائلات ديال اللعابا اليوم الاثنين، وسمح لهم باش بحضرو الحصة التدريبية ديال ليكيب ناسيونال اللي بداية دابا فتيران الدحيل فالدوحة القطرية، فخطوة منو باش يموتيفي اللعابا، ويحسو بلي كاملين عائلة وحدة، والأجواء زوينة حماسية فالتيران.
كيخوض المنتخب الوطني المغربي فهاد اللحظات أول حصة تدريبية من بعدما ربح بلجيكا البارح، وبدا كيوجد للماتش الجاي ضد كندا اللي غادي يتلعب الخميس الجاي وغادي يكون حاسم فالتأهل للدور الثاني من كأس العالم.