تونس هرب عليها الزهر.. دارت ماتش كبير مع فرنسا بطلة العالم ولكن تقصات من المونديال

تقصات تونس من كأس العالم قطر 2022 وما قدراتش تأهل لثمن النهائي، واخا دارت ماتش كبير اليوم الاثنين ضد بطلة العالم فرنسا فالجولة الثالثة من دور المجموعة للبطولة، وسالات معها تعادل.
وكانت تونس رابحة فرنسا بواحد لزيرو بهدف ماركاه لها وهبي الخزري فالدقيقة 58، وحتى هاد الرباح ما كانش كافيها باش التأهل لثمن النهائي، حيث وفنفس الجولة وفنس لكروب والتوقيت كانت أستراليا سالات الماتش ديالها ضد الدنمارك رابحة بهدف واحد لزيرو ماركاه ماثيو ليكي فالدقيقة 60، وكان خاص الماتش ديال هاد الاستراليين والدنماركيين يسالي تعادل وتونس تبقى رابحة باش يتأهلو التوانسة لثمن النهائي، ولكن حتى حاجة من هادشي ما وقعت حيث حتى فرحة الفوز على بطل العالم تحرمت من التونسيين بسبب أنتونيو كريزمان اللي ضرب التعادل لفرنسا فآخر لحظة.
وتأهل لثمن النهائي من لكروب 4 كل من فرنسا اللي تصدراتو برصيد 7 النقاط ومعها أستراليا الثانية برصيد 6 النقاط، وجات تونس ثالثة برصيد 2 النقاط، والدنمارك فالمركز الأخير برصيد نقطة وحدة.