البرتغال تأهلت لثمن المونديال والكرة بغات فيرنانديز ضد الأوروغواي وعكست لرونالدو

تأهلت البرتغال لثمن نهائي كأس العالم قطر 2022، من بعدما ربحات اليوم الاثنين، منتخب الأوروكواي فالجولة الثانية من البطولة بنتيجة 2 لزيرو.
الشوط الأول سالا بالتعادل زيرو لزيرو ما بين المنتخبين، وتسنات البرتغال الدقيقة 54 باش تماركي البيت الأول من تمريرة ديال برونو فيرنانديز مسها كرستيانو رونالدو بشعرو، والفيفا حسبت الهدف لفيرنانديز واخا رونالدو لعب دور كبير باش تماركا حيث موه حارس مرمى الاوروكواي سيرجيو روشيت، وحاولو الاوروكواي يرجعو فالماتش وزكلو شي فرص خصوصا من عند لويس سواريز وخرج كريستيانو فالدقيقة 81، وبقات النتيجة كيف ما هي حيث البرتغال تحكمت تكتيكيا فالماتش، وقدرت تجيب ضربة جزاء فأخر اللحظات ولكن رونالدو ماكانش عندو الزهر عوتاني باش يماركي فهاد الماتش حيث كان خرج وتكلف برونو فيرنانديز وضربها ماركاها، وكان قريب يزيد بيوتا آخرين ولكن روشيت والبوطو منعوه.
وبهاد الرباح تأهلت البرتغال لثمن النهائي حيث كتصدر المجموعة 8 برصيد 6 النقاط، وتابعها غانا فالمركز الثاني برصيد 3 النقاط، الاوروكواي وكوريا الجنوبية برصيد نقطة لكل منتخب، أما فالجولة الجايا غادي تلعب البرتغال مع كوريا الجنوبية وغانا مع الأوروكواي.