مونديال 2022: البرتغال ربحت غانا فماتش مشوق وشابع بويتا

ربحت البرتغال اللي كيقودها الأسطورة ديالها كريستيانو رونالدو منتخب غانا اليوم الخميس فماتش مشوق بنتيجة 3 لبيوتا مقابل 2 فالجولة الأولى من دور مجموعات كأس العالم قطر 2022.
الشوط الأول ما بين المنتخبين سالا تعادل زيرو لزيرو، وتسناو البرتغال الشوط الثاني وبالضبط الدقيقة 65 باش يماركي لها رونالدو البيت الأول من بيلانتي، ومن بعدها غادي يجيبو الغانيين التعادل فالدقيقة 73 بواسطة الكابيتان ديالها اندري أيو، وغير خرج أيو وهي تضرب البرتغال البيت الثاني على غانا واللي ماركاه لها جواو فيليكس فالدقيقة 78، ومن بعدها ماركات الثالث بواسطة رفاييل ليوا فالدقيقة 80، ومن بعد منها خرج مدرب البرتغال كريستيانو رونالدو وهي تستغل غانا الارتخاء ديال البرتغاليين وقلصت النتيجة وماركا لها عصمان بوكاري البيت الثاني فالدقيقة 89، وحاولو الغانيين يجيبو التعادل وكانوا قراب ولكن ما قدروش وبقات النتيجة كيفما هي حتى سالا الماتش.
وبهاد الرباح تصدرت البرتغال المجموعة 8 برصيد 3 النقاط، وتابعها الاوروكواي وكوريا الجنوبية بنقطة لكل منتخب من بعدما تعادل بيناتهم اليوم، وغانا فالمركز الأخير بزيرو بوان.