حمد الله كيرد على صحاب "النقابة" وكأيكد بلي اللعابا فالمنتخب كيعملوه فحال الخوت

كذب الدولي المغربي عبد الرزاق حمد الله الكلام اللي بدا كيروج من بعد الماتش أميكال ديال المنتخب الوطني المغربي البارح ضد جورجيا، واللي كيدعيو ماليه بلي مهاجم الاتحاد السعودي مديورة عليه النقابة من عند اللعابا فليكيب ناسيونال وهذا هو السبب اللي خلاه ما يسجلش.
وخرج عبد الرزاق حمد الله فتصريح على قناة الشارقة الإماراتية وقال بلي رجع للمنتخب المغربي من الباب الكبير، حيث غادي يشارك فكأس العالم وهذا كادو بالنسبة له وشكر المدرب وليد الركراكي والطاقم التقني على ثقتهم فيه.
وبخصوص الأجواء داخل المنتخب قال حمد الله: "اول مرة كنشوف الأجواء بهاذ الجمالية فالمنتخب، وحنا اللعبا كاملين خوت وقراب من بعضيتنا سواء لعابا أو طاقم تقني وكاينة بيناتنا المودة والمحبة وكنشرك الجمهور المغربي مرة أخرى وكنقولهم حمد الله غادي يقول الكلمة ديالو".
وكيجي الكلام ديال عبد الرزاق حمد الله باش يحد من الإشاعات اللي راجت من بعدما سالا ماتش المغرب ضد جورجيا البارح، واللي روجها شي وحدين على مواقع التواصل الاجتماعي كيدعيو بلي اللعابا فالمنتخب دايرين عليه النقابة وهذا هو السبب اللي خلاه ما يماركيش، مع العلم أنه صيد بيلانتي وخلاه لسفيان بوفال ماركاه.