ربح المنتخب الوطني المغربي الماتش أميكال ديالو الأخير قبل كأس العالم 2022، واللي لعبو اليوم الخميس ضد جورجيا فمدينة الشارقة فالامارات، وهو الماتش اللي نقلاتو قناة الرياضية وعلق عليه محمد التويجر بالدارجة المغربية والجمهور ودار البوز حيث المغاربة كيهضرو عليه فالفيسبوك ملي بدا الماتش حيث ما مولفينش يسمعو بزاف التعليق فالقنوات المغربية على ليماتش بالدارجة. المنتخب المغربي ربح جورجيا بنتيجة 3 لزيرو، ونجح يوسف النصيري فافتتاح التسجيل للأسود فالدقيقة 6، فالدقيقة 26 تمكن حكيم زياش من استغلال خروج لكول ديال جورجيا ورسل الكرة نيشان للشبكة وماركا البيت الثاني وظلت النتيجة كيفما هي حتى سالا الشوط الأول. ومع بداية الشوط الثاني دار الناخب الوطني عدد من التغييرات باش يعطي الفرصة لأكبر عدد من اللعابا ومنهم عبد الرزاق حمد الله اللي جاب بيلانتي فالدقية 76 نجح سفيان بوفال اللي مكلفو الركراكي بتنفيذ ضربات الجزاء من تحويلها لهدف ثالث للمنتخب المغربي، وظلت النتيجة كيفما هي حتى سالا الماتش مع العلم أن أنس زروري اللي يالاه جا غير الصباح للمنتخب حتى هو دخل فالجولة الثانية. للإشارة فالمنتخب الوطني المغربي من بعد الماتش ضد جورجيا غادي يشد الطريق من مدينة الشارقة الإماراتية إلى العاصمة القطرية الدوحة باش يكمل البريباراسيون ديالو لكأس العالم وغادي يلعب أول الماتش فالبطولة نهار 23 فهاذ الشهر ضد كرواتيا.
