الركراكي باغي المنتخب يلعب ماتش أميكال ثاني من بعد جورجيا

من المنتظر يلعب المنتخب الوطني المغربي ماتش أميكال ثاني من بعد ماتش منتخب جورجيا الودي، اللي غادي يتلعب فالإمارات نهار 17 من نوفمبر قبل أيام على كأس العالم فقطر.
مصادر مطلعة كشفت أن وليد الركراكي مدرب المنتخب الوطني المغربي باغي يلعب ماتش أميكال ثاني من بعد جورجيا، باش يختبر فيه العناصر اللي مخذاتش الفرصة ضد الجورجيين ووقع الاختيار ديالو على الدحيل القطري اللي كتربطو معه علاقات زوينة.
وفحالة تقرر إجراء الماتش ما بين المنتخب الوطني المغربي ونادي الدحيل القطري فغالبا غادي يكون الموعد ديالو من يوم أو يومين على ماتش جورجيا، وغادي يتلعب بلا جمهور، مع العلم أن مجهودات كبيرة تبدلت من الجامعة الملكية المغربية لكرة القدم منذ مدة لتوفير أكثر من ماتش أميكال للمنتخب المغربي لكن التزامات المنتخبات الوطنية مكناتها من توفير ماتش ودي واحد فقط.