المحمدية دارو ريمونتاد على التطوانيين فماتش مشوق

قدر شباب المحمدية يقلب النتيجة على المغرب التطواني فالماتش ديالهم اللي لعبوه اليوم الأحد فتيران البشير فالمحمدية ضمن الجولة 7 من البطولة الاحترافية لكرة القدم.
وربح فريق شباب المحمدية المغرب التطواني بنتيجة 4 الأهداف مقابل 3، وماركاو التطوانيين هما الأولين فالماتش، وزربو على المحمدية وسجلو عليه 2 بيوتا بواسطة كل من محمد سعود فالدقيقة 8، ويوسف الهواري فالدقيقة 11.
لكن شباب المحمدية قدر يرجع ودار ريمونتادا وقلب النتيجة، حيث غادي يماركي 3 لبيوتا متابعين بواسطة كل من أسامة لمليوي فالدقيقة 23 و26 وعبد الرزاق ناقوس فالدقيقة 49، وغادي يرجع المغرب التطواني فالماتش وماركا التعادل فالدقيقة 68 عن طريق عبد الحق عسال، لكن المحمدية قدرو يماركيو بيت الرباح وغادي يرجع عبد الرزاق ناقوس يماركي لهم الهدف الرابع فالدقيقة 79.
وبهاذ الرباح رفع شباب المحمدية رصيدو إلى 11 نقطة فالمركز السادس، أما المغرب التطواني من بعد هاذ الخسران فبقى فالمركز 12 برصيد 8 نقاط.