الرابور طوطو هبط كواريه للمحافظين وكيعتاذر: لي تقلقو مني سمحولي وكنصلي – فيديو

الرابور الگراندي طوطو، هبط كواريه وقدم اعتذارو للناس لي مقلقين منو حسب تعبيرو، هو عارف شكون كيقصد. خصوصا بعدما رفع التحدي مور الجدل لي ناض على السهرة لي دار ف السويسي وقال فيها بلي اول مرة كتعيط لي الوزارة وبلي رآه اقود وزارة ف تاريخ الوزراء لي داز.
طوطو، ف برنامج بدون لغة الخشب لي كينشطو رضوان الرمضاني، كذلك هضر على واقعة تصريحه على الحشيش، وعلى الشراب لي كيبان هازو فالفيديوهات، وقال بلي داكشي ف لي بواط ماشي أمام العموم.
طوطو تلفات ليه الحلوفة وباش يصيفط مساج ويعتذر للمحافظين قاليهم بلي كنصلي.
اش علاقة صلاة بالراب ولا بالفن اصلا، باش يقحم الدين فنقاش مجتمعي كيبين بلي هاد الرابور غير كيبرر وصافي.
وكرر طوطو بلي هو مغربي ولد المغرب وفاش كيمشي لبرا كيهز معه الراية المغربية. هادي ماعندها تا معنى حيث حتى حد مكيشك فوطنيتو.