ولي العهد تلاقى طوطو ولارتيست وفنانة اخرين

علمت "كود" ان ولي العهد الامير مولاي الحسن، تلاقى فنانين.. وحضر لسهرات دارت فالرباط منها سهرة إلگراندي طوطو وبعدها ديال لارتيست، بمناسبة اختيار الرباط عاصمة الثقافة الافريقية. هاد السهرات دارت فساحة السويسي OLM.
ولي العهد مهتم بالفن وبهاد الجيل، وعجبو الحال يكونو عندنا فنانين من طراز عالمي، وعندهم جمهور كبير داخل وخارج المملكة.
طوطو كان دار حفلة ليلة الجمعة 24 شتنبر 2022، حضر فيها جمهور غفير، وحظى بمتابعة ولي العهد لي كان حاضر. هادي اول سهرة دياد الرابور كيحضر ليها حسب ما علمته "كود"
طبعا حضرو كذلك بنات وأبناء زعماء سياسيين، ومثقفين واعلاميين. حسب مصادر "كود".
فديك الجمعة، غنات الفنانة النيجيرية أيرا ستار، والتي أمتعت الجمهور الحاضر بباقة من أغانيها المشهورة والمعروفة عند الشباب. أما فنان الراب المغربي El Grande Totto فقدم واحدة من أجمل سهراته على حد تعبيرو، وتفاعل معه الجمهور بشكل كبير و ترك ذكريات غادي تبقى راسخة عند معجبيه اللي جاو للرباط للاستماع بالرابور المحقق لأرقام قياسية ونجاحات كبيرة على المستوى القاري.
طوطو كيغني لجيل جديد، جيل محتاج لي يفهمو، عندو طريقة فالتعبير وعندو اسلوبو. وهادشي كيبان فالمحتوى لي كينشرو الالاف من الشباب المغربي ف تك توك وانستگرام وفايسبوك وتويتر ويوتوب. جيل تجاوز النخبة السياسية والفنية والاعلامية الحالية.