الحسيمة.. لابيجي شدات طبيب فالمستشفى الجهوي متورط فجرائم الفساد المالي

علمت "كود" أن الشرطة القضائية بمدينة الحسيمة، شدات زوال يوم الثلاثاء 11 أكتوبر الجاري، طبيب كيخدم فقسم المستعجلات بالمستشفى الجهوي، وذلك للاشتباه في تورطه في قضية تتعلق بجرائم الفساد المالي.
توقيف هاد الطبيب جا بعدما حطات شي مرا شكاية للنيابة العامة تتهم فيها هاد الطبيب بتعريضها للابتزاز وطلب مبلغ مالي على سبيل الرشوة، باش يمكن بنتها من شي شهادة طبية تثبت أمدا العجز كيفوق 21 يوم، قصد استغلالها فشي ملف زجري.
النيابة العامة تحركات بالزربة وتم فتح بحث قضائي وتكليف الشرطة القضائية اللي قرقبات على الطبيب. هاد الطبيب تشد فحالة تلبس بملاقاة الشاكية والبنت ديالها فطوموبيلتو الخاصة واللي كان موقفها فحي كالابونيكا.