واش كيلمح للقطيعة مع الفرونسي؟. الوزير بنموسى: كاين إقبال التلاميذ على الانجليزية وممكن نقريو مواد علمية بهاد اللغة مستقبلا

قال شكيب بنموسى، وزير التربية الوطني والتعليم الأولى والرياضة، إن "تدريس اللغة الانجليزية كاين ف2200 مؤسسة تعليمية كيقريوها أقل من 9 الف استاذ".
وأوضح الوزير خلال ندوة صحافية صباح اليوم، بلي "كاين إقبال على اللغة الانجليزية من طرف التلاميذ المغاربة".
وأفاد المسؤول الحكومي بلي تطوير الجانب اللغوي فالمغرب مهم خصوصا تعلم الانجليزية، وانه كمرحلة أولى "غانوسعو عدد المدارس لي كتقرا فيها، وتهيئة الظروف باش تكون لغة لتدريس العلوم فحال الفرنسية" وفق تعبيره.
وأضاف المتحدث :"مكانة اللغة الانجليزية فيها اهتمام وفيها طلب مهم، انطلاقا من هاد الموسم الهدف ديالنا اولا على مستوى الاعدادي نوسعو المجال ديال تمكين التلاميذ من اللغة الانجليزية، عبر الرفع من عدد اساتذة الانجليزية وتوظيفهم وكذلك فتح منصات للتلاميذ من أجل تعلم هذه اللغة".
وأشار الوزير بلي مستقبلا ممكن يتقراو مواد علمية بالانجليزية، مؤكدا بلي التلاميذ كيطمحو بهاد اللغة يكون تفتح باش يعرفو شنو كيطرا فالعالم وخصنا نمشيو فهاد الاتجاه.