فطنجة كولشي كيدوي على الديواني اللي دار عرس لبنتو ب 500 مليون سنتيم. شي كيقول نسيبو اللي دارو وشي كيهدر على ثروة كبيرة لهاد السيد وقدام كاع الدولة – تصاور

كلشي كيهدر على حفل الف ليلة وليلة فطنجة داز السبت اللي فات 6 غشت 2022 فمالاباطا. بات العروسة ديواني سابق. صحاب طنجة استغربو من ثروتو لكبيرة. العرس حسب ما كيدور فطنجة طلع بنص مليار.
طبعا هاد الثمن ما كيشملش كلشي المصاريف. يقدر يفوت هاد المبلغ.
حسب مصادر ل"كود" الحفل اللي حضرو ليه مشاهير غناو فيه باش ياخدو الغرامة ويديرو فليسات صحاح، بحال دنيا باطما، حضرو ليه صحاب هاد الديواني وبيزنسمانات واثرياء المدينة اللي عندهم شبهات كثيرة فثرواتهم.
كان خاص مفتشي المالية يحضرو ليه ويدخلو لخزينة الدولة فلوس صحيحة محتاجينها من هاد ملايرية اخر ساعة.
ديواني صاليرو عادي ومعروف ولى ملايري. كان كيسوگ طونوبيلة فالمضيق ثمنها فايت 200 مليون سنتيم. دابا عرس ليلة تحطات فيه نص مليار.
حسب مصادر "كود" اللي دار العرس هو نسيبو وهو رجل اعمال طنجاوي. حتى هو منين جاب هاد لفلوس؟.
الديواني كان مشى من الجمارك هادي مدة. قدم استقالتو بعد ما خدم فالناظور وطنجة.