تفاصيل جديدة عن مافيا فيها رجال اعمال واطباء متهمة تبييض 3 الاف مليون دولار. ملايرية كازا كثار دوزو عطلة عند اشهرهم فكوسطا ديل سول وعندو فيها بوحدها شي 40 شقة فاخرة

القضية اللي هزات الدار البيضاء ونشراتها جريدة "الصباح" قبل ايام على ما سمته "اكبر عملية غسل الاموال"٬ جابت فيها "كود" معطيات جديدة.
وفق مصادر ل"كود" فان المتهم الرئيسي فهاد الشبكة رجل اعمال مغربي يهودي الديانة٬ عندو عقارات كثيرة فالمغرب وخارج المغرب.
وفق مصدر "كود" فهاد رجل الاعمال اللي كانت عندو شركة وباعها بشي 26 مليار سنتيم٬ كيملك فماربيا وبويرطو بانوس فالكوسطا ديل سول جنوب اسبانيا شي 40 شقة. واوضح مصدر "كود" ان غالبية ملايرية كازا والرباط كانو كيكريو من عندو فالصيف.
المصدر قال ل"كود" انو شرى دار وحدة بحوالي 1.5 مليون يورو فيما قيمة باقي الشقق ما بين مليون يورو و450 الف يورو.
وحسب نفس المصادر ل"كود" فهاد الشخص المحوري فهاد الشبكة قدر يشري فشارع واحد فكازا عبر شركتو للعقار 12 ڤيلا فعين الدياب فكازا كما يملك عقارات فباريس وبريطانيا والبرتغال وطبعا مدن مغربية اخرى خاصة طنجة
ارتباطات هاد الشخص بملايرية جداد فطنجة خلي العين تحط عليه. هادو من تجار المخدرات اللي محتاجين لتبييض الاموال. فهاديك الليستا ديال 26 ملايري اللي نشراتها "الصباح" كاينين اطباء ورجال اعمال وشي وحدين عندهم شركات الدوا.
التحقيقات مع بعضهم لحد الان على "تبييض الاموال متحصل عليها من المخذرات والاتجار بالبشر". وصلات تقديرات لفلوس اللي تهربات وتبيضات كثر من 3 الاف مليون دولار.
وكانت الفرقة الوطنية للشرطة القضائية فتحات تحقيق فوحدة من اكبر عمليات غسل الأموال وتبييضها وبدات الأبحاث مباشرة بعد وصول مغربي معروف في مجال العقار والتجارة والصناعة، إلى المطار الدولي محمد الخامس. المتهم الرئيسي مازال خارج المغرب. لملايرية لخراين فكازا شاداهم الخلعة وكيتسناو نوبتهم باش يجاوبو المحققين علي مصدر ثروتهم لكبير داخل وخارج المغرب وعلاقتهم بهاد المتهم