عمدة سلا ل"كود": قررنا غرامات فايتا 200 ألف درهم عقوبة على شركة اوزون لي ملتزماتش بالعقد وخلات الازبال فالشوارع

كشف عمدة سلا، عمر السنتيتي، في اتصال مع "كود"، عن تسجيل غرامات تفوق 200 ألف درهم ضد شركة "أوزون" بسبب تراخيها في جمع الأزبال خلال شهر يونيو، وذلك قبل ماتسالي الشركة الكونطرا ديالها نهار 30 يونيو.
وقال السنتيسي ل"كود" :"مور فاش درنا ابيل دوفر وجات شركة جديدة خدات المارشي ديال جمع الازبال بلاصت شركة اوزون لي مخداتش المارشي هاد المرة، وقع تراخي كبير فجمع الازبال، وصل لدرجة اننا نتدخلو عبر لجن المراقبة ونجيبو مفوضين قضائين لمعاينة الازبال المنتشرة فجوج مقاطعات (تابريكت والعيايدة)".
هاد التراكم الكبير ديال الازبال تزامن مع قرب عيد الاضحى، وهادشي خلال مجلس جماعة سلا يتدخل بصرامة ويطبق الغرامات المالية على شركة اوزين.
وحسب ذات المصدر، فإن الشركة وصلت لدرجة انها تخوي الحاويات ديال الزبل وتهزها وتخلي الزبل فالشارع، مضيفا :"بلي دبا المشكل تطوا فهاد يومين، بحيث تظافرنا الجهود باش الشركة الجديدة تمكن من العمل بوسائلها وفظروف مزيانة".
وعن سبب رفض الشركة جمع الازبال، قال المتحدث :"الكونطرا مع اوزون كتسالي ف30 يونيو، وباش تكون مرحلة انتقالية من شركة لشركة جديدة كاندير ملحق عقد فيه من 3 اشهر تال 6 اشهر، لكن اوزون رفضت دير معانا الملحق للاسف".