مابغاش يرجع ل"تويتر".. ترامب قريب يلونصي رسميا موقع التواصل الاجتماعي الخاص بيه

كشف ديفين نونيس، الرئيس التنفيذي لتطبيق "تروث سوشيال"، كوقع التواصل الاجتماعي اللي كان علن الرئيس الميريكاني السابق دونالد ترامب بللي كيوجد فيه، (كشف) أن لابليكاسيون غادي تكون واجدة أونلاين على الأنترنيت فاللخر ديال هاد شهر ماي.
نونيس قال أن التطبيق باقي ما خداش الموافقة من "كَوكَل بلاي ستور" الخاص بالأجهزة اللي كتخدم بنظام التشغيل "أندرويد"، باش الناس تبدا تيليشارجيه.
دونالد ترامب قرر باش يدير منصة التواصل الاجتماعي الخاصة بيه بعدما تم منعو من موقع "تويتر" في الانتخابات الرئاسية اللي فاتت، بعدما تم اتهامو بنشر الفايك نيوز على نتائج الانتخابات وعمليات فرز الأصوات فمواجهة منافسو ديك الوقيتة، الرئيس الميريكاني الحالي جو بايدن، زيادة على تهم بتشجيع على العنف وأعمال الشغب، خصوصا اللي وقعات من طرف أنصارو فمقر الكابيتول.