واش غادية توقع مفاجأة ويكون ميلونشون فالدور الثاني فبلاصة لوبين؟ الفرق بيناتهم 0.8 فالمائة

لحدود الساعة تقريبا لحداش ليلا ففرانسا مرشح اليسار الراديكالي جون لوك ميلونشون غادي ويجمع اصوات. كان قبل ساعات هو الثالث ب20.1 فالمائة من الاصوات. قبلو كانت مارين لوبين عن اليمين المتطرف ب23.3 بالمائة واللي جا اللول هو ايمانويل ماكرون =ليبرالي جمع حولو اليمين المحافظ والاشتراكيين= ب28.1 بالمائة.
لكن تقديرات الدور الاول من الانتخابات الرئاسية الفرنسية اللي تجرات اليوم دابا كتعطي لمارين لوبين 23 بالمائة فيما طلع ميلونشون ل22.8 فالمائة٬ اي الفرق بيناتهم دابا هو 0.8 بالمائة.
لحد الان اللي ترشح للدور الثاني فالانتخابات الرئاسية اللي غادية دار بعد 15 يوم هو ايمانويل ماكرون ومارين لوبين.
واش نسبة ميلونشون ممكن تطلع اكثر؟ حسب معهد استطلاعات الرأي "ايپسوس" فاللي تأهل للدور الثاني هي لوبين٬ لكن صحافيين فقنوات فرنسية كتواكب هاد الليلة الانتخابية ما كيستبعدوش شي مفاجأة هاد الليلة.
المهم التشويق مضمون فهاد الانتخابات الرئاسية بفرنسا