خصوصا على الجينيراسيون اللي طالعة.. نيوزيلاندا كتوجد تمنع الكَارو نهائيا – فيديو

علنات نيوزيلندا أنها غادي تمنع الكَارو على الشباب ديالها، وغايكون ممنوع بداية على الناس اللي عندهم أقل من 14 عام يشريوه بشكل قانوني.
وزيرة الصحة النيوزيلندية عائشة فيرال (Ayesha Verrall) قالت: "هاد التشريع الجديد كيعني أن سن التدخين القانوني غايتزاد باش الجيل الجديد ديال الشعب مايكونش مبلي، وهذا يوم تاريخي لصحة الشعب ديالنا". "
وزادت: "بغينا أن الشباب والأجيال الجاية مايبداوش الكَارو ومايتبلاوش نهائيا".
‏
ومن غير العمر، غادي يولي الكَارو غالي باش بنادم مايبقاش يشريه، والهدف هو أن البلاد مايبقاش فيها الكَارو بمرة من هنا ل4 سنين الجاية (في أفق 2025).
ومن بين الإجراءات الجديدة الأخرى كاين تقليل الكمية القانونية ديال النيكوتين في منتجات الطابا إلى مستويات ناقصة، وتقليص البلايص اللي يمكن يتباع فيهم الكَارو.