بعد إصابة واحد من آباء التلاميذ ب”كورونا”.. مدرسة فرنسية فكازا سدات

علنات مدرسة “إيرنيست رونون” فكازا، واللي تابعة للوكالة الفرنسية للتعليم فالخارج (AEFE)، بللي واحد من الآباء ديال الدراري اللي كايقراو فيها، مريض بفيروس “كورونا” المستجد، حيت دار التحاليل المخبرية وخرجو إيجابية.
المدرسة، فرسالة ليها وجهاتها للآباء، علنات بللي سدات بسباب هذ الحادث، باش تحافظ على الصحة والسلامة ديال الأطر ديالها التعليمية والتلاميذ وعائلاتهم.
وطالبات الآباء باتباع الإجراءات والتدابير الوقائية المعمول بها للحد من انتشار الفيروس، وعلموهوم باي مستجد إلى بانو فيهم او فوليداتهم أعراض الفيروس.
وأكدات المدراسة باللي التعليم ديالها غايستمر عن بعد، وغايكون تحديدا عن طريق الإيمايل، وغادي يشرفو عليه الأساتذة ديال المدرسة، المؤطرين غادي يديرو كل ما فجهدهم باش المدرسة تعاود تحل فأقرب الآجال.
وشارت إدارة بللي غاتبقى ديما على تواصل مع الآباء، اللي كاتناشدهم، كيف كتناشد جميع العاملين فالقطاع ديال التعليم باش يديرو يد فيد ويضامنو حتى تدوز هذ الازمة.