غدير 4 ديال الرحلات فالسيمانة.. هكا غادي ترحل فرانسا المواطنين ديالها اللي بقاو حاصلين فالمغرب

سفارة فرانسا فالمغرب علنات على زيادتها فعدد الرحلات اللي كتدير باش ترحل المواطنين ديالها اللي حاصلين فالمغرب، فعز أزمة فيروس كورونا المستجد.
وحسب بلاغ للسفارة، أكدات بللي غدير 4 ديال الرحلات فالأسبوع للفرنسيين، من مطار كازا الدولي، وجوج من مطار مراكش.
الرحلات الاستثنائية اللي غاتديرهم فرانسا غادي يكونو ابتداء من 4 ماي الجاي، وغيستفدو منها الفرنسيين اللي ضروري خاصهم يمشيو، لأسباب طبية أو لانهم خلاو قاصرين وحدهم ففرانسا وخاصهم يمشيو باش يقابلوهم، او بالنسبة للناس اللي تقاضاو ليهم الفلوس او كيخدمو ففرانسا ومهددين باش يجريو عليهم.
وغتحدد السفارة والقنصليات العامة لاليسط ديال الناس اللي غيستفدو من هذ الرحلات، وهوما اللي غادي تبيع ليهم التذاكر، دون سواهم، واللي غيخصهم يدليو بوثائق كتبين احتياجهم لمغادرة المغرب فأقرب وقت.