استفدو منها 41 صحافي.. “لاماب” بدات تخدم بتقنية “العمل عن بعد” ابتداء من اليوم

علنات وكالة المغرب العربي للأنباء (لاماب) بللي غاتبدا، ابتداء من اليوم الاثنين، تخدم بتقنية “العمل عن بعد”، وهذشي تماشيا مع المجهودات اللي كايديرها المغرب للحد من انتقال فيروس “كورونا” المستجد.
هذ القرار، اللي علنات عليه “لاماب” فقصاصة ديالها، اليوم الاثنين، غادي يستافدو منو ب41 شخص خدامين فيها، وهوما الأشخاص ذوو الاحتياجات الخاصة، والعيالات الحاملات والمرضعات، والاشخاص اللي ازواجهم كيخدمو فالسبيطارات، وهذشي حتى لإشعار آخر.
“لاماب” وجدات اللوجيستيك اللي غايخصها باش تفعل هذ النظام الجديد، اللي كتشوف بللي ماغايخليش الفيروس الخطير ينتشر وسط الناس، وخصوصا الموظفين ديال الوكالة وعائلاتهم، بحكم أن الوباء ولا كيشكل تهديد على المستوى العالمي.
هذ القرار اتخذاتو “لاماب” من خلال التشاور مع الطبيب ديال الوكالة، وعملا بالنصائح اللي علنات عليها الحكومة المغربية، باش الفيروس مايتفشاش بشكل كبير فالبلاد.
و”لاماب” خدامة باش تدير “العمل عن بعد” بالتناوب، على حساب بلانينكَات غايتحددو قبل، للناس اللي ولادهم قل من 16 لعام، وهذ الإجراء غايهم 253، وحتى الناس اللي خدامين فالجهات والأقاليم البعيدة غايخدمة عن بعد.
والمديرية ديال “لاماب” طلبات من الصحافيين ديالها باش يلتازمو بهذ القرار، ويكونو بهذشي يقظين باش يواجهو الوباء.