خاص. عميد كلية الحقوق بسطات طيروه. هددوه يكتب الاستقالة ولا يتقال. دابا واش غادي يتحاسب على فضيحة "الجنس مقابل النقط"؟

علمت "كود" ان رسالة الاستقالة للي وقعها عميد كلية العلوم القانونية والاقتصادية والاجتماعية بسطات ما جاتش من مدايتو لراسو. حسب مصدر ل"كود" من وزارة التعليم العالي فهاد الشي جا بعد توصل الوزارة بتقرير من المفتشية العامة اللي كانت فالجامعة. التقرير فيه دور العميد فهاد الفضيحة.
الوزارة وفق مصدر "كود" بغات تفادى شوهات اكثر وما ديرش مسطرة الاقالة فحقو٬ فقالو ليه: شوف يا الشريف اما تقدم استقالتك ولا غادي تقال وتشوه اكثر.
ديك الساعة كتب ديك الاستقالة اللي جات بعد تحريك المتابعة فحق 5 الاساتدة فنفس الكلية اللي كانو كيفرضو على الطالبات يديرو معاهم الجنس باش يعطيوهم نقط مزيانة.
البارح الوكيل العام بسطات تابع استاذ بهتك عرض انثى بالعنف والتحرش الجنسي فحالة اعتقال فيما تابع وكيل الملك بسطات 4 اساتذة بتهم التحرش الجنسي والتحريض على الفساد واستغلال النفوذ والتزوير في وثيقة تصدرها ادارة عامة اي الكلية وتهم اخرى
دابا خاص التحقيق حتى مع عميد الكلية. واش كان عارف ولا للا واش تستر ولا اللا. هاديك الاستقالة او الاقالة راها ما كتعفيهش من الملاحقة ايلى كان على علم بهاد لفضايح فجامعتو