المغاربة اللي وقفو طيارة "العربية" وهربو فالصبليون.. وقفو فالمطار 4 سوايع وعطلو 60 رحلة وطلع واحد من اللي هربو فلسطيني

كشفت الصحافة الاسبانية ان من بين 21 او اكثر للي هربو من طائرة "العربية" بمطار "بالما دي مايوركا" الاسبانية قبل يومين كاين فلسطيني واحد. هادو كانو فمرحلة من كازا لاسطمبول التركية وشي حد قال باللي سخف حقاش مريض بالسكر. ونزلات الطيارة على عجل بالمطار.
لكن هاد الشي كان خطة وصافي. غير وقفات الطيارة وهربو الدراري.
دابا تشدو على الاقل 14 منهم مول موتة حمار. وحسب الامن الاسباني فقد خلف هاد الحادث ارتباك كبير فالمطار. توقف عن استقبال الطائرات لمدة 4 سوايع وخربق كثر من 60 رحلة.
دابا كاينة تحقيقات باش يعرفو واش هاد الشي كان مخطط ليه ولا غير صدفة.
الدراري اللي تشدو غالبا غيرسلوهم للمغرب والباقي اللي هربانين مازال مبحوث عليهم..