رسميا: من اليوم يمكن لاي مغربي يدخل للصبليون سوا داير استرازنيكا سوا داير سينوفارم

اليوم الاثنين 7 يونيو يمكن لاي مواطن من الاتحاد الاوربي او باقي دول العالم باستثناء الهند والبرازيل وجنوب افريقيا٬ يدخلو لاسبانيا ايلى كانو دايرين الڤاكسان.السلطات الاسبانية قالت باللي اللقاحات المطلوبة هي اللي وافقات عليها الوكالة الاوربية للادوية او اللي اعتامداتها منظمة الصحة العالمية. هاد الشي كيعني ان لمغاربة اللي دايرين "سينوفارم" الشينوي يمكن ليهم يجيو لاسبانيا بهاد الوثيقة.
المغرب بدا هاد النهار الباسبور ديال التلقيح. بيان لوزارة الصحة كان قال باللي ابتداء من هاد النهار غادي يتفعل.
هاد القرار غادي يسهل تنقل الناس اللي باغيين يسافرو لاسبانيا.
دابا ما بقاش التسافيرة لاسبانيا وفق سلطات مدريد٬ مرتبط فقط بشي مبرر بحال التعليم او التطبيب٬ تزاد عليه حتى اللي بغى يفوج ويحوص مع راسو.
طبعا لمغاربة خاصهم يتسناو سيمانا كاملة. حقاش الحدود الجوية ديالنا ما غادية تفتح حتى الثلاث اللي جاي 15 يونيو.
طبعا الازمة الاخيرة غير المسبوقة بين الرباط ومدريد غادية تأثر شوية على تنقل المغاربة٬ خاصة ان النقل البحري بين الدولتين مازال ما علنوش وقتاش يفتحوه. بيان الخارجية البارح استثنى الصبليون من عملية مرحبا وقال باللي غادي يدار من موانئ فرانسا وايطاليا من خلال عبارة "فيما يخص عودة المواطنين المغاربة القاطنين بالخارج، بحرا، في إطار عملية "مرحبا 2021′′، فإنها ستتم انطلاقا من نفس نقاط العبور البحري التي تم العمل بها خلال السنة الماضية".