واخيرا لقاو الرضيعة وامها اللي حرگات لسبتة. واش شي شبكة تهريب البشر هادي. الرضيعة اللي نقذها "گوارديا سيڤيل" وشككو فيها لمغاربة خرجات فحوار مخبية فدار سبتاوي لي دخل ليها ولادها وما باغياش ترجع

الرضيعة لي الصورة ديالها دارت العالم، وقالت مصادر مغربية أنها ماشي مغربية، مشات قناة لا سيكستا عند الواليدة ديالها فسبتة ودارو معاها حوار، وقالت الام انها كانت خدامة كحمالة فطاراخال ولكن ملي سدو المعبر مابقاتش لاقية باش توكل ولادها.
هاد المعاناة كتحمل فيها سلطات الفنيدق جزء كبير هي والجهة، حقاش شافو مشكل الحمالة كيكبر ومابغاوش يلقاو ليه حل، واي تبعات فهاد الملف كتحملها السلطة بوحدها.
أما من الجانب الاخر، فكان تركيز الاعلام الاسباني على هاد لمرا، باش يحاولوا يضربو فالمغرب، رغم انها قدمات تصريخات خطيرة، ولكن لا الاعلام ولا سلطات سبتة ماتسوقوش، خاصة أنها قالت بأن سبتاوي هو لي دخل ليها ولدها، بمعنى ان شي حد من سبتة خرج حتى للفنيدق ودخل الولد وهذا تهريب للبشر، وعلاش هاد السيد غادي يعرض راسو للمحاسبة القانونية باش يدير هادشي؟.
وقالت ايضا أنها دابا مخبية عند شي سبتاوي فدارو، وهنا كيتطرح سؤال اخر، علاش غادي يخبعها، ومشحال من واحد مخبيها، وواش هادشي كيتعلق بشبكات لتهريب البشر؟ لانها قالت بالي هاد السيد دخلها وعيط عليها قال ليها راه الحدود مفتوحة. واش هاد الشي فسبتة ولا كاينة جهات عندنا وعندهم عاجباها الوضعية ودخلات فلوس صحيحة فيها، دابا القضية بيد الصبليون اللي خاصهم يعرفو فين كاينة هاد السيدة وكيفاش دخلات ومع من نسقات.
الصورة شوهة لينا. تأكيد انها مغربية ماشي سورية عايشة فالمغرب زاد فضحنا. قولها انها مشات مع ولادها وما باغيات ترجع وباللي كانت خدامة فالطراباندو كيزيد يعرينا.