جابها فراسو. صلى الجمعة وجمع عليه المصلين فبنگرير وبدا يسب ويكفر فالدولة ومؤسساتها على قبال التراوح

علمت "كود" باللي مواطن تشد فبنگرير اليوم بعد صلاة الجمعة. هاد المواطن سالات الصلاة وجمع عليه الناس وبدا يهاجم فالدولة ومؤسساتها بسباب قرار الحكومة منع التجول بعد الفطور فهاد رمضان.
هاد الشي وقع فجامع القايد العيادي فدوار لخليفة وسط بنگرير. المواطن اللي مازال كيحققو معاه باذن النيابة العامة٬ غير وفوم وگول. سب كلشي وعاير كلشي.
دابا جابها فراسو. سخونية الراس كتخرج على ماليها. ينفعوه هادوك اللي عمرو الشواري على امثالو وهاجمو الحكومة على قرار منع التجول فليل رمضان بسباب كورونا. جماعة العدل والاحسان من هادوك اللي شعلو بنادم. دارو السياسة بالتراوح.