عنداكم من تلعبو لعبة الارهابيين الدواعش وتبانيكيو. لقاو شي حد عندو موس فمرجان مراكش تخلعو الناس وسلموه للبوليس

هدف الارهابيين الدواعش الاول هو يخلقو “التوحش” كلشي يرتابك. كلشي يولي كيشك. هاد الاجواء بغاوها الارهابيين. بسبابها دارو الفيديوهات الاخيرة وديما كيديرو الفيديوهات. فمسعاهم باش يسيطرو على المجتمع كيوظفو هاد “التوحش”. غير لمغاربة خاصهم يكونو علي وعي بهاد اللعبة. ماشي ساهل تقاومها باش كيكون البانيك.
هاد الشي وقع بحالو هاد الصباح فمراكش. فحسب مصدر ل”كود” فان شي حد هاز شي موس. گزار ولا بنادم عادي ولا عندو ميولات داعشية. المهم تجمعو عليه بنادم. حاصروه. تشد حدا طواليت مارجان اللي كاين فطريق كازا. جات اجهزة الدولة الامنية وسالات القصة.
المهم تشد والناس تخلعات. مزيان تكون يقظة المواطنين حقاش الامن ما يمكنش يتحقق بلا بيهم بلا مساعدهم بلا دعمهم الكامل. غير خاص يبعدو على لعبة الارهابيين الدواعش