برافو.. ́سمير مشهور' خدام بالليل ونهار باش يجيب المغرب الدفعة الثانية من اللقاحات وها مع من كينسق

علمت "كود" من مصدر مطلع أن سمير مشهور، الكفاءة المغربية اللي تطوع يخدم بلادو، ونائب رئيس شركة سامسونغ ديال الادوية، باقي كيتفاوض مع شركات اللقاحات باش المغرب يكون من الدول الأوائل اللي غايتوصلو بالدفعة الثانية من اللقاحات.
معطيات حصرية توصلت بها "كود"، تفيد مشهور كيتواصل ديما مع وزارتي الصحة والداخلية، باش يشوفو الامكانيات المتاحة باش المغرب يجيب اللقاحات المتاحة.
مشهور حسب مقرب منو، مكيحكش راسو، عطا وقت للمغرب، واخا عندو مسؤولية كبيرة فاكبر شركة عالمية فصناعة الادوية.
معلوم ان مشهور ساهم بشكل كبير باش المغرب يجيب الدفعة الاولى من لقاح استرازينيكا، جوج مليون جرعة، دول كثيرة مفهمتش كيفاش دار ليها المغرب.
طبعا مشهور ومسؤولين الدولة تفاوضوا بشكل مباشر مع شركة استرازينيكا وجابو اللقاح.
الدفعة الثانية حسب مصدر "كود" غاتكون فيها 8 مليون جرعة من فاكسان استرازينيكا غاتجي غعاد الايام وغالبا نهاية الاسبوع او الاثنين، ويمكن ينفتح المغرب على لقاحات اخرى بحال جونسون – جونسون.