خاص. الدق تم: المغرب شرا 8 مليون جرعة جديدة من فاكسان استرازينيكا.. ومصادر "كود" كتوقع يوصل فهاد الايام

علمت "كود" من مصدر مطلع أن المغرب خلص شركة استرازينيكا، الدفعة الثانية من اللقاح واللي قدرو مصدر "كود" ب 8 مليون جرعة جديدة.
الضربة اللي دار المغرب فاللأول باستيراد جوج مليون جرعة من فاكسان استرازنيكيا، زاد اكد انه بلد قادر يخلق المفاجآت والدليل انه عملية التلقيح بسرعة وبدقة عالية وبتنظيم محكم.
معطيات حصرية توصلت بها "كود" أن الكمية الكبيرة ديال اللقاح استرازينيكا غادي دخل فهاد الايام او الاسبوع المقبل على ابعد تقدير، بمعنى 4 مليون مغربي غادي ياخذو اللقاح.
الخطة باش خدم المغرب، بالاستعانة بتجربة ووطنية كفاءات مغربية على رأسهم سيمر مشهور نائب رئيس سامسونج لي لعب دور مهم من أجل حصول المغرب على تلقيح أسترا-زينيكا، الخطة نجحات وبهرات العالم.
المغرب يوميا كيعلن على حصيلة التلقيح مع السادسة من كل مساء، بحيث وصل عدد المستفيدين من التلقيح يتجاوز 200 الف.
حاليا الصين عطاتنا 500 الف جرعة من الفاكسان سينوفارم، واسترازنيكيا جوج مليون جرعة، يعني اذا زدنا 8 مليون جرعة جديدة اللي خلصها المغرب يعني غانوصلو ل 10 مليون و500 الف جرعة.
وفي هذا قالت البروفيسورة امنة بركات، عضو فاللجنة العلمية المغربية، في تصريح ل"كو" إن عملية التلقيح تمر في ظروف جيدة، وبلي مكاينش تا حالات لأعراض جانبية خطيرة في كل جهات المملكة، وأن الامور غادية مزيان.
واضافت بركات أنه في انتظار التوصل بالدفعات الاخرى من اللقاحات، فإن الكل معول باش نحققو المناعة الجماعية في اقرب الاجال.
عملية التلقيح كيشرف عليها الملك شخصيا ومتبعها، وهو اول مغربي يبدا الفاكسان اللي ختار المغرب يشريه.