علمت "كود" من مصادر مطلعة أن تحقيقات أمنية مطولة تشهدها العاصمة السياحية للمملكة، تقوم بها فرق الشرطة القضائية مع عدد من رجال الأعمال والملايرية بمدينة مراكش، على خلفية شكاية "مثيرة" رفعها ضدهم رجل أعمال سعودي، يتهمهم ب"النصب والاحتيال" عليه وتوريطه في ملف شيكات بدون رصيد. وحسب مصدر "كود" فإن لوبي من الملايرية لي محسوب عليهم هاد العيادي لي كيقولو متحكمين فالسوق السياحي بمراكش، وحاول يدير ضغوطات، خرجات ليهم هاد القضية ديال السعودي، واللي مؤازر من قبل السفارة السعودية. وحسب معطيات "كود" فإن فرقة الشرطة القضائية استمتعت لأحد أبرز الملايرية في المدينة الحمراء، ويتعلق الأمر بالملايري العيادي، اللي تم التحقيق معه بناء على شكاية رجل الاعمال السعودي، في حين لا تزال الأبحاث مستمرة للتحقيق مع زعيم شبكة تبييض الأموال، لي تم اطلاق سراحو مؤقتا. واستغربت مصادر "كود" كيفاش يتم اطلاق سراح واحد عندو شكايات ضدو ولحد الآن حتى ما عرف فين مشا، وهاد شكاية ديال رجل الاعمال السعودي ضدو. بحيث أن حقوقيين أكد ل"كود" أن "ملف شبكة تبييض الأموال مزال مسالاش وبلي لا يعقل واحد متهم رئيسي فالشبكة متورط فملفات وشبهات كثيرة يطلق سراحو وخصوصا باقي عندو الاستئناف ف ملف تبييض الاموال". دبا كاينا حرب كبيرة ف مراكش، الحموشي كينقي المدينة ويرد ليها الاعتبار الأمني ليها. وهادشي فرح عدد من المستثمرين لي معولين على الحملات الأمنية القوية لي كيدير الحموشي. مدينة مراكش معولة بزاف على الفاكسان، حيث مشاريع كثيرة خصوصا المتعلقة بالسياحة، كتسنا الفرصة، باش تفوت الجايحة، باش تستقبل السياح المتعطشين لهاد المدينة السياحية. وسبق ل"كود" أن نشرت بأن الشكاية التي تقدم به رجل أعمال سعودي معتقل بسبب "الشيك على سبيل الضمان"، ضد الصراف، أخذت طريقها نحو المعالجة. والخطير في الشكاية هي انها جبدات الشراكة لي بين الصراف والملياردير العيادي، خصوصا وأن السعودي بغا يفرش كولشي. يشار إلى أن المحكمة الابتدائية بمراكش قد قضت بالبراءة ل"صراف مراكش" وتوزيع 32 سنة سجناً على أفراد عصابة تبييض الأموال. وهادشي خربق عدد من المتتبيعن لهاد القضية لي تزامنت مع الجدل ف مناقشة مشروع قانون يتعلق بمكافحة غسل الأموال في البرلمان. غير هاد الصراف تجبد ثاني ف ملف السعودي. وهادشي ضر بصورة الاسثتمار فمراكش. وخلا البوليس يكثر من التحقيقات لكشف خيوط ملف أسود لعدد من رجال الأعمال بمراكش.
