كيفاش كوشنير جايب وفد اعلامي اسرائيلي كبير وبوريطة ما كيهمو الا اللي يصورو ويمجدو وما خبرو حتى شي صحافي واش دخل ميريكان فهاد الشي

وزارة الخارجية متخلفة بزاف فتعاملها مع الصحافة. وزيرها ناصر بوريطة كيضحك على لمغاربة. ما شفناه لا فقنوات عمومية لا فلقاء صحافي بعد صفقة الاعتراف الامريكي بمغربية الصحراء مقابل التطبيع مع اسرائيل. بوريطة بقى ينوعر ومشى لقنوات عربية بان متعفر متخلف فاسلوبو. شفناه فتصريحات لاعلام اسرائيلي او اجنبي مختالف. بدل خطابو.
المهم هاد السيد اللي عزيز عليه يجيب اللي دايرين بيه يلبسوه حوايجو ويعبدوه ماشي يخدمو معاه. شفنا صورة ليه باش حضر للقاء فرقاء ليبيا فطنجة باش نزل من الطونوبيلة وكان كيتسناه شخص ولبسو الفيستا ديالو. بوريطة كينتاقم من ايام كان كيديرها للفاسي الفهري. باش كان كيهز ليه الشكارة فمانهاست. اييه ايام.
المهم هاد الوزارة وهاد الوزير بالضبط مستمر فعلاقتو المتخلفة مع الصحافة. دابا جاريد كوشنير جاي مع مستشار الامن القومي الاسرائيلي نهار الثلاث الجاي فاول رحلة من تل ابيب الى الرباط. هاد الشي داخل فمشروع التطبيع. وفق ما علمته "كود" جايبين معاهم الصحافة الاسرائيلية.
لحد الان ما خلينا ما سولنا واش غادي يكون اعتماد الصحافة المغربية٬ ولكن متخلفي الخارجية ساكتين. ما كيقولو والو.
دابا هاد التصرف راه ولى ممارسة مع هاد الرجل. لدرجة انو داير لائحة فيها صحابو اللي كيتاصل بيهم شخصيا ماشي باش يبريفيهم كيف كيدار فالعالم ولكن باش يعرض عليهم حروفا حافظهم وطريقتو ديال: 1.2.3.4
وداير لائحة كحلا للصحافيين المغاربة اللي مانع على ناسو يتعاملو معاهم. اييه رجعها تاع باه ماشي غير موظف اياماتو قريبة.
هادي قضية وطن ماشي قضية بوريطة. قضية الدولة اللي تكلفات بيها ماشي هاد الوزير. الصحافة من حقها تحضر ودير خدمتها. دابا هو مانعها.
مانعها ومدخل سفارة اميركا فالرباط اللي كتحدد حتى هي واش الصحافة تحضر ولا اللا. اليوم فهاد الصباح دايرين اجتماع مشترك. واخا يكون حضور الصحافة راه كلشي كيدار بتخلف. كيتعطلو بزاف