شكون يسد فم بنعرفة قبل ما يقودها. ما كيتشاور مع الخارجية بحال ايلى كينتاقم منهم على طردو من هاد البوسط

ما عمر المغرب كان فيها رئيس حكومة =الدستور الجديد= او وزير اول بحال سعد الدين العثماني فتنقازو على مواضيع ذات حساسية وتهم العلاقات الخارجية المغربية. كل مرة كيقودها شي تقويدة ويبدا يقاد. فنيويورك مشى يحضر للدورة 73 للجمعية العامة للامم المتحدة ويقرا كلمة رئيس الدولة٬ بدا يتلاقى مع بعض الوفود.
هاد الشي ماشي سوقو هادا سوق وزارة الخارجية والتعاون. وفق مصدر ل”كود” فالسيد ما عمرو تشاور مع هاد الوزارة فلقاءاتو. هاد لفهامة عندو خلاتو يتلاقى مع وزير خارجية كوسوفو ونائب وزيرها الاول ودار تدوينة وناض كيصحح باللي موقف المغرب مازال من كوسوفو كيف كان.
علاش كوسوفو مشكلة كبيرة؟ هاد الاقليم اللي فيه مسلمي البانيا كيطالب بالاستقلال من صربيا وكانت حرب تماك ودارت قوات اممية “كيفور”. غير المغرب اختار الدفاع على مصالحه وداير علاقات مزيانة بزاف مع صربيا اللي ما كتعتارفش بالبوليساريو بل ناسها كيجيو لمدن العيون والداخلة. لقاء بحال ديال بنعرفة غادي يقلقلهم خاصة انه من حزب اسلامي وغادي يتقرا قراية اخرى.
هاد بنعرفة كيتصرف وكأنو باغي ينتاقم من وزارة الخارجية والتعاون اللي كان فيها حتى ل2013 ولحد الان باقي ما عمرو عرف علاش جراو عليه كيف قال هو فاخر مجلس وطني لحزبه قبل ايام.
الخارجية خايفينو يورط المغرب فمشكلة اكثر من مشكلة كوسوفو. السيد فيه الزايد والمصيبة ما فيدوش لا فالخارجية لا فمنصبو اليوم اللي كبير عليه.