واخا ضعفها كورونا ووقفات مشاريع وسرحات موظفين.. رونو عينات مدير جديد على راس فرعها فالمغرب

وخا ضربها فيروس كورونا المستجد وخلاها تعلق الاستثمارات ديالها ومشاريع توسيع مصانعها فالمغرب، مجموعة رونو المغرب مازال كتكافح وخدامة بشكل متواصل، ودابا قررات تعين مدير عام جديد غيبدا الخدمة ديالو ابتداء من اللول دشهر يوليوز الجاي.
المدير الجديد، وهو فرنسي اسمو فابريك سريفولا، غيجي بلاصة لوريت ديوت اللي غيتقلد منصب مدير التسويق ديال الشركة ففرنسا، وغيخدم رفقة المدير العام للمجموعة فالمغرب، مارك نسيف.
وواخا هذ التغييرات فمناصب المسؤولية اللي كتدير رونو، تداعيات كورونا نزلات من رقم معاملاتها، وخلاتها تضطر تلغي 15 ألف وظيفة حول العالم، من بينها 4600 وظيفة ففرنسا وباقي الوظائف فجميع فروعها فالعالم، ومنها المغرب حتى هو.
ورونو غادي تستعمل طريقة ذكية من أجل إلغاء الوظائف، بلا ما تسرح حتى شي حد، وهذشي عن طريق المغادرة الطوعية وإعادة تدريب الموظفين.
وللإشارة، فرع رونو فالمغرب كيتكلف بإدارة أنشطة المبيعات والخدمات ديال طوموبيلات رونو وداسيا، من خلال تقوية الريادة ديالو فالسوق فالمغرب بنسبة 42 فالمية ف2019، وهكذا ولا المغرب هو البلد الثالث عالميا على مستوى بيع طوموبيلات الشركة الفرنسية، لكن من المحتمل هذشي يتبدل مع الأزمة اللي خلفها هذ الوباء.