من ضمن 32 ألف مغربي حاصلين برا، بعد تعليق الرحلات الجوية والبحرية بسبب فيروس كورونا المستجد، كاينين مشاهير معروفين (فنانين، رياضيين ومدونين) حتى هوما بدورهم بغاو يرجعو لبلادهم فأقرب أجل، دارو نداءات كثيرة عبر مواقع التواصل الاجتماعي، ونشرو تدوينات، وعطاو تصريحات للصحافة، لكن مازال مارجعوش، "كود" حاولات ترصد الوضع ديال 6 منهم. محمد الريفي: حصل هو ومرتو فمصر وصابرين من ضمن هذ المشاهير، الفنان المغربي محمد الريفي، اللي محبوس هو ومراتو فالعاصمة المصرية القاهرة، "كود" تواصلات مع الزوجة ديالو اللي قالت فتصريح مقتضب بللي "هوما صابرين، وكيتسناو الوباء يمشي باش يرجعو لبلادهم" وكشفات بللي هوما ماشي بوحدهم، لكن معاهم "عالقين خرين مغاربة". وكان الريفي حط تدوينة على "فيسبوك"، قال فيها أنه حاول يتواصل مع السفارة المغربية فالقاهرة قبل رمضان باش يرجع، لكن قالو ليه بللي صعيب يكون هذشي، الريفي عبر فتدوينة خرى على رغبتو فتدواز رمضان مع العائلة، لكن هذشي ما تمش، ولحد الساعة باقي حاصل تماك. عصام كمال: حصل ففرانسا وتوحش ولدو وبلادو الفنان المغربي عصام كمال حتى هو بقى حاصل ففرانسا، حيت كان حصل فيها قبل كورونا لأسباب خاصة، كان قال، فتصريح سابق ليه مع"كود", بللي هذشي مامنعوش باش يدوز أجواء رمضانية مزيانة، كيف استغل الفرصة ديال الحجر الصحي باش يوجد لأعمال فنية جديدة، ألبوم قريب يصدر وألبو آخر لايت.. كمال واخا هكذاك مانفاش اشتياقو للبلاد بشكل عام، والإبن ديالو وكَاع العائلة اللي كاينة فالمغرب بشكل خاص، ولكن كيقول "الحمد لله على كل حال"، كمال كيحاول يشوف الأمور بشكل إيجابي وخا هكذاك. يسرى الميموني: واحلة فتركيا كتنتقد العثماني: "إلى حليتو الحدود غانجيو على رجلينا" علنات المدونة المغربية يسرى الميموني، على حسابها فموقع التواصل الاجتماعي "فيسبوك"، على الحصلة ديالها حتى هي برا المغرب، وتحديدا ف"تركيا"، فتدوينة ليها كتنتقد فيه خرجة رئيس الحكومة "غير الموفقة"، اللي كتقول بللي جاب فيها معلومات قديمة. وقالت أنه إلى تحلو الحدود، على هذ التقالات ديالهم، غيمكن يرجعو هوما من تركيا على رجليهم، وتاسفات لحال مجموعة من الناس عاناو بزاف، واحد فيهم ماتت الأم ديالو وماشافهاش، وأسرة ماتت بنتهم فكسيدة، وقالت بللي توفير السكن راه ماكافيش. حسن سعادة: مشا لفرانسا باش يشارك فشي تداريب وحصل باش يوجد للاستحقاقات المقبلة مع باقي أعضاء المنتخب المغربي للملاكمة، البوكسور المغربي حسن سعادة مشا لفرانسا يشارك فتداريب سلسلة الملاكمة الاحترافية، من بعد جات كورونا وتسدو الحدود وبقا حاصل. سعادة كان محتاج للمشاركة فهذ التداريب فهذ التوقيت بالضبط، لكن كورونا دارتها بيه، وبقا حاصل فمدينة ليموج الفرنسية.. كيحاول سعادة يكمل التداريب ديالو فالدار باش يحافظ على جاهزيتو، ويستعد مزيان للاستحقتقات اللي جاية فوقت صعيب يتحدد مع هذ الوباء، لكن التدريب مزيان يواضب عليه، خصوصا وأن المغرب مراهن عليه باعتبارو واحد من الملاكمين الكبار. سمير يعيش: غير بجوح سيمانات باش مشا لبريطانيا وهو يحصل تماك حتى مدرب المغرب الفاسي، سمير يعيش، قادتو التداريب باش يحصل برا البلاد، حسب تصريحات كثيرة للصحافة قال أن كان مشا لبريطانيا باش يشوف العائلة من جهة، وباش يشارك فبرنامج تدريبي مع نادي سوانزي سيتي فمنطقة وييلز فبريطانيا، ما كملش حتى جوج سيمانات على المجيء ديالو، وهوما يحبسو الرحلات للمغرب. يعيش بقى مع عائلتو فبريطانيا، والتداريب تحبسات من بعد بسباب كورونا، حاول يتصل بالسفارة باش يرجع لكن علموه بللي المغرب حبس جميع الرحلات، فمكان عليه غير يكَلس ويصبر. رضا العطاسي: حصل فاش مشا يشوف عائلتو ففرانسا
مدافع حسنية أكَادير حتى هو حصل ففرانسا، بعدما مشا يشوف العائلة ديالو، كَلس معاهم شحال وكان مقطع الطيارة باش يرجل للبلاد، لكن الحدود كانت تسدات، وبقى معاهم تما. ولحد الساعة.يالاه 600 واحد من المغاربة العالقين اللي رجعو من الجزائر، الحكومة عوالة ترجع 300 فكل سيمانة لكن هذشي ماقبلوش بيه العالقين، واعتبروه تباطؤ كبير ومحاولة للحكومة لربح الوقت إلى حين عودة الرحلات كيفما كانت.
