هاد الفيروس ما فيه ثقة.. بعد 6 أيام بلا حالات.. تونس سجلات 6 إصابات جديدة بكورونا

علنات وزارة الصحة التونسية على تسجيل 6 إصابات جديدة بفيروس كورونا المستجد، من بعد قرابة أسبوع ماكانت سجلات فيه تونس حتى إصابة جديدة، وكيتعلق الأمر ب5 حالات من الناس اللي جابوهوم من برا وتوضعو بشكل إجباري فالحجر الصحي، بالإضافة لحالة وحيدة متوفاة.
وبهذشي، وصل العدد الإجمالي دالناس المصابين بالفيروس فتونس ل1043 حالة، من بينهم 819 حالة شفاء، و46 حالة وفاة، بينما 178 إصابة مازالة حاملة الفيروس، منها 3 فقط اللي كيتلقاو العلاج فالسبيطارات.
وكيتبين من خلال هذ المعطيات بللي من الصعب القول على شي دولة مابقاوش كيتسجلو عندها إصابات جديدة بكورونا أنها "قضات على الفيروس"، حيت من طبيعة الفيروسات اللي كتكون بأعراض طفيفة أو بدون أعراض أنه مايتمش الكشف على جميع المصابين بيها، وتقدر ترجع بالتالي بسرعة.