كانت خالطات المصاب اللي سافر من كازا لسوس.. طبيبة تقاست بكورونا فتارودانت

عرفات "كود" من مصادرها بللي طبيبة تقاصت بفيروس كورونا المستجد، من بعد ما كانت خالطات واحد السيد مصاب كانو شدوه، حيث خرق حالة الطوارئ الصحية وسافر من كازا لتارودانت بلا حتى شي وثيقة كتثبت تنقلو وبدون غرض استثنائي، وكانت هذ الطبيبة هي اللي مشرفة على الحالة ديالو.
كيتعلق الأمر بطبيبة عامة خدامة فقسم المستعجلات فالمستشفى الإقليمي بتارودانت، نقلوها لبارح الخميس لصبيطار الحسن الثاني فأكادير باش تخضع العلاج، حيت خرجو نتائج التحاليل اللي دارت على الفيروس إيجابية.
وتم اكتشاف إصابة الطبيبة بكورونا بعدما خضعو المخالطين ديال السيد اللي سافر من كازا لتارودانت، ومن بينهم ثلاثة من عناصر القوات المساعدة اللي خرجو نتائجهم سلبية.
إصابة الطبيبة هي الإصابة الجديدة اللي تسجلات فجهة سوس ماسة، واللي خلات مجموع عدد الإصابات يرتفع ل73.
وللإشارة، بزاف ديال الأطباء والفراملية وتقنيي الصحة تقاسو بكورونا، منهم اللي خالطو مصابين، ومنهم اللي تقاصو بيها فخدمتهم، بعدما كانو كيشرفو على حالات ديال "كوفيد 19"