احتمال نقل عدوى الفيروس من اللي تشافاو.. تسجيل إصابة جديدة بكورونا فمدينة وجدة "غير مسبوقة"

بعد جوج سيمانات استقر فيها عدد المصابين بفيروس كورونا المستجد فالجهة الشرقية، نهار السبت 9 ماي تسجلات إصابة جديدة فوجدة، والمركز الاستشفائي الجامعي محمد السادس خرج يوضح كيفاش ومنين جات.
المركز اعلن، فبلاغ ليه، بللي هذ المصاب خالط جوج من الناس كانو مصابين بكورونا، واحد فيهم دوز 50 يوم وهو كيتعالج قبل ما يتم الإعلان على شفاؤو، بعدما خرجو جوج تحاليل دارها سلبية، في حالة اعتبرها المركز "فريدة وغير مسبوقة".
وقال المركز الاستشفائي بللي اللجنة العملية ديالو غادي تخضع جميع المخالطين لهذ الحالة اللي تشافات من كورونا، بالإضافة لحالة 9 ماي، لتحاليل قياس الأجسام المضادة فالمصل، باش تعرف واش إصابتها بالفيروس قديمة ولا جديدة، هذا فحالة ما كانت مصابة.
وإلى ثبت أن إصابات هذ المخالطين جديدة، فهذا غيولد احتمال انتقال عدوى الفيروس من الناس اللي تشافو منو، وعلى هذشي نصحة المركز الناس باش "يحتارمو تعاليم الحجر الصحي والإجراءات الوقائية