بعدما تسجلات 3 إصابات بكورونا فصفوف الموظفين فيه.. اسواق السلام فمراكش سدات

عفراء علوي محمدي- كود//
عرفات "كود" من مصادر محلية بللي أسواق السلام كَيليز بمدينة مراكش سدات، بعدما تسجلات 3 إصابات بفيروس كورونا المستجد فصفوف العاملين فيها.
وغير قبل أيام، تبينات إصابة عامل بالسوق الممتاز المذكور، فجناح ليليكترو ميناجي، بعدما حس بالأعراض دالإصابة، ودخليه الشك ومشا باش يدير التحاليل اللي خرجات النتيجة ديالهم إيجابية.
مباشرة بعد التأكد من إصابة العامل الأول، تدار الكشف لبزاف دالخدامين اللي معاه، واتضح إصابة جوج خرين، كيف من المحتمل تبان إصابات جديدة.
ومازال النتائج ديال بعض الموظفين فالسوق الممتاز ماخرجات، بينما مخالطين خرين للموظفين الثلاثة بداو يديرو ليهم التحاليل اليوم، واللي مازال طلبو منو يدير الحجر الصحي فالدار قبل ما يجيو يهزوه.
وللإشارة، حتى أسواق السلام فمدينة قنيطرة تسدات هذي دابا أسبوع، من بعد ما تبثات الإصابة ديال عامل فيه، بينما الموظفين لوخرين خرجو نتائجهم سلبية.