3 أطباء من فاس داروهم فالحجر الصحي بعد الاشتباه فإصابتهم بفيروس "كورونا"

أكدات مصادر طبية ل"كود" بللي 3 ديال الأطباء دخلوهوم هذ الصباح للحجر الصحي، بعد الإشتباه فإصابتهم بفيروس كورونا المستجد.
وحسب المصادر فالأمر كيتعلق بطبيب واحد فمستشفى جامعي الحسن الثاني وجوج أطباء فمستشفيات عمومية أخرى.
وحسب المصادر نفسها، دارو الأطباء التحاليل باش يعرفو واش مصابين بالفيروس ولا لا، ولحد الساعة النتائج ديال التحليلات مازال ماخرجات، وهوما دابا فالعزل الصحي.
وأكدات المصادر الطبية بللي نتائج التحاليل تقدر تتعطل شوية، وتقدر توصل حتى ل48 ساعة، بحكم ان المختبرين اللي كيديرو هذ التحاليل، واللي هوما مختبر باستور ومختبر المعهد الوطني للصحة، بعاد على فاس، وعليهم ضغط كبير.
وحاولات "كود" تتصل بالمندوب الإقليمي ففاس والمكلف بالتواصل كذلك فالمنطقة، لكن هاتف اللول صونا بلا جواب، والثاني قطع الخط.