زمن كورونا أرضية خصبة لانتشار الفايك نيوز. ردو بالكم.. شي مساليين كيروجو خبار ناسبينو لأخبار اليوم على تواريخ العطل والامتحانات.. مدير نشر الجريدة نفا ومصدر من وزارة الصحة ل"كود": هذشي كلو كذوب

شي مساليين قبهم بداو يروجو خبارات زائفة وشائعات ماعندها لا ساس ولا راس على تطبيق التواصل الفوري "واتساب"، كيقول من خلالها بللي الحجر الصحي غيستمر حتى ل21 ماي، والعطلة الربيعية غادي تكون من 11 ماي وغاتستمر حتى ل25 ماي، وحددو حتى الامتحانات ديال السادس والتاسع والسيزيام والباك، وحتى النتائج ديالهم فوقاش غادي تكون.
وباش يعطيو مصداقية لهذ لاجوندا عجيبة اللي استبقات الأحداث، نسبو هذ المعطيات كاملة لجريدة "أخبار اليوم"، وقالو بللي هي اللي ورداتها فواحد من مقالاتها، وقالت بللي غيتم الإعلان على هذ التواريخ فنهاية هذ الأسبوع بشكل رسمي.
"كود" تواصلات مع مصدر فوزارة التربية الوطنية، وقال فحديثو معاها بللي هذشي مجرد أخبار زائفة، والوزارة مزال ما حددات هذ التواريخ لحد الآن، وحتى أخبار اليوم مانشراتش هذشي نهائيا.
ونشر يونس مسكين، مدير نشر جريدة أخبار اليوم، تكذيب لهذ الأخبار اللي راجت على الصفحة ديالو فموقع التواصل الاجتماعي "فيسبوك"، وحذر من "أي نشر أو ترويج لهذ المزاعم"، على حساب هضرتو.
وكتستعد الجريدة لنشر تكذيب رسمي ليها فعدد الجريدة اللي غيخرج غدا بصيغة بي دي إف.