رئيس الجامعة الدولية فتصريح ل”كود”: حتى واحد ما تقاس ب”كورونا” عندنا والطالب عندو نزلة برد عادية

قال نور الدين مؤدب، رئيس الجامعة الدولية بالرباط، بللي الأخبار اللي كتروج بخصوص إصابة طالب فالجامعة بفيروس “كورونا”، عارية من الصحة.
وزاد مؤدب كيقول، فاتصال هاتفي مع “كود”، بللي مكاين حتى حاجة من هذشي اللي كيروج “والسلطات دابا غادي تخرج بلاغ بهذ الصدد، والله يهدي الصحافة والله يهدي هذ الناس”، على حد تعبيرو.
ووضح مؤدب بللي الطالب المعني بالأمر كان فأمريكا وماشي فالطاليان كيف كيقولوا، وبللي تم الفحص ديالو بشكل عادي، وترسلات التحليلات لINH، وخرجو النتائج سلبية، بمعنى أن الطالب عندو فقط نزلة برد عادية.
وقال مؤدب بللي هذ الخبر خلع الطلبة فالجامعة، وكذلك العائلات ديالهم اللي تهولو بزاف.
وللإشارة فمواقع إلكترونية عديدة نشرات قبل قليل خبر إصابة طالب بالجامعة الدولية بفيروس “كورونا”، وتحديدا ف”تيكنوبوليس” بسلا، وبللي تم إخضاعو للحجر الصحي.