الكتبيين للجنة اليقظة: تضررنا بسباب كورونا وبغيناكم تعفيونا من الضرائب وتلقاو لينا حلول

تشكاو صحاب المكتبات للجنة اليقضة الاقتصادية من الضرر اللي لحقهم، بسباب تفعيل حالة الطوارئ الصحية اللي تسبب فيها فيروس كورونا المستجد "كوفيد 19".
وعلنو صحاب المكتبات، بللي اضطرو يسدو حوانتهم، وهذشي خلاهم مايلقاو باش يسدو قوت اليوم ديالهم، وحتى فلوس الكرا ماعندهم منين يجيبوها.
وعلى هذشي، طالبات الجمعية لمغربية للكتبيين، فمراسلة حصلات "كود" على نسخة منها، باش تشوف من حال الوضعية ديالهم، وتعتبرهم من المهنيين اللي تضررو اقتصاديا من الجايحة، وتشوف ليهم حلول.
وطالبو الكتيين لجنة اليقظة باش تعفيهم من أداء الضرائب هذ العام، وتشوف اش تدير مع التغييرات اللي غاتطرا للكتب المدرسية، وبادرة المحافظ المدرسية اللي كاتعطى، واللي ممكن تزيد تأزم عندهم الأوضاع.