استنفار فالمطار العسكري بنسليمان.. ليزومبيلونس والخيام من أجل استقبال مغاربة مشتبه فإصابتهم ب”كورونا” جايين من برا

كيعرف المطار العسكري فبنسليمان استنفار أمني كبير، بعدما تم نصب وتجهيز ما يقارب 20 خيمة لاستقبال المغاربة اللي جايين من أوروبا، واللي مشتبه يكونو تقاسو بفيروس “كورونا” المستجد، باش يتم فحصهم والتحقق من سلامتهم الصحية.
مجموعة من الأخبار المتطابقة واللي تم تناقلها على نطاق واسع كتقول أن الامر كيتعلق بطائرة خاصة جاية من الطاليان، وغاتجيب معاها مغاربة هربانين من الفيروس الخطير.
عشرات من البوليس والجادارمية جاو للمطار، بالإضافة لعشرات الأطباء المتخصصين فالالتهابات والامراض التنفسية والفرملية والمساعدين الصحيين، ووقفتت فعين المكان اعداد كبيرة ديال سيارات الإسعاف.
واتصلات “كود” المندوب الإقليمي للصحة فبنسليمان، عشاق بوشعيب، لأخذ مزيد من المعطيات حول الموضوع، رفض التصريح بدعوى أنه ماشي فمحل انه يعطي أية إفادة، لكنه مانفاش الأخبار الرائجة.