ارتفاع عدد الحالات المحتملة بإصابتها بكورونا ل38

بعد المهاجر المغربي الأربعيني المقيم فالطاليان، وزارة الصحة اليوم علنات على تسجيل حالة جديدة ديال الإصابة ب”كورونا” المستجد (كوفيد 19)، بالإضافة لارتفاع عدد الحالات المحتملة ل38 حالة، 36 حالة منها مستبعدة.
وحسب المعطيات اللي توفرات عليها “كود”، فالأمر كيتعلق بسيدة عندها 70 عام، حتى هي يالاه كي رجعات من الطاليان باش تشوف العائلة فالمغرب، ودابا راها فالحجر الصحي فمستشفى مولاي يوسف للأمراض الصدرية فكازا.
ومن المرجح يتم إخضاع كاع الناس اللي كانو مع هذ السيدة فالطيارة للفحوصات والتحليلات اللازمة باش يعرفو واش مراضين ب”كورونا” ولا لا، وهذشي بالإضافة لعائلتها وكَاع الناس اللي تلاقات معاهم، مع إخضاع المشكوك فيهم للحجر الصحي، وتتبع الحالة الصحية للوخرين.
وبمجرد ما تم الإعلان على تسجيل أول حالة للفيروس، أطقم طبية كثيرة بزي خاص توجهات لعند الناس اللي شكو فمرضهم ب”كورونا لمختلف” المدن المغربية، باش يديوهم يديرو ليهم التحليلات ويسيفطوها لمعهد باستور.
وتداولو نشطاء صور وفيديوهات ديال هذ الأطقم الطبية، وخصوصا فيديو ليها فحي التشارك فكازا، والمرجح يكون هذ الفيديو كيتعلق بهذ السيدة نيت.