نايضة على مجلة “لوروبورتير” بسباب غلافها واتهامها ب”العنصرية. صورة لافريقي مع “اول حالة فالمغرب د”كورونا فيروس” وعبارة “شكون المسؤول”

نايضة هاد الصباح على غلاف مجلة “لوروبورتير” بسباب غلاف عتابروه منتقدوه عنصري. علاش هاد الشي. بالنسبة لصحافيين ولباحثين ولمواطنين فحساباتهم على وسائل التواصل الاجتماعي ان الغلاف فيه عنصرية. علاش حقاش دار صورة افريقي كيشوف فالكاميرا ومغطي نيفو. اللي قلق كثر اللي انتاقدوه هو العبارة المرافقة للغلاف “اول حالة “كورونا فيروس” بالمغرب”. ثم “شكون المسؤول”.
اللي ما عجبوش الغلاف انتاقد عبارة “شكون المسؤول” مع صورة افريقي. بحال ايلى هاد الافريقي هو سباب هاد الفيروس. طبعا كاين اللي يقدر يرد ويقول باللي اول ضحية لهاد الفيروس هو الافريقي. أي ان الفيروس بان فآسيا وداز لاوربا وما خاصش افريقيا تخلص الثمن واخا هاد الفيروس ما كيعرف حدود ولا اثنية.
المهم ان اعلان المغرب عن حالتين جداد وبجوجهم بحال اللي قبلهم من فرانسا اي من الغرب خلى هاد النقاش على الغلاف ياخد واحد الحدة فشي شكل.